عم مغاوري هو اللي مربيني وانا صغير ودايما يقولي ياواد ياخالد اوعى تكون فكرت نفسك عشان كبرت وبقيت مهندس هتكبر علي ياولا ، دانا اللي مربيك من ايام ماكان عندك سنتين وكنت تقعد على باب داركم ومناخيرك سايحة ، ولما تشوفني تعيط وماتسكتش غير لما آخدك عند التوتة اللي على راس الغيط واجيب لك توت من الاسود وتقعد تاكله وتلغمط وشك بالتوت لحد مايبقى شكلك عامل زي بنات الايام دي ، حاطين على وشهم الاحمر والاخضر وعاملين شكل البلياشتو ، ويقعد يحكي لي حكايات عن نفسي لما كنت صغير كلها فضايح .
المهم جاني امبارح عم مغاوري وقال لي : "هو انت ياولا ماوراكش غير المحروق ده اللي اسمه الكمبلوتر وكل ماجي الاقيك داخل على المستوى التوجيهي (يقصد المنتدى الترفيهي) عمال تضحك وتكتب نكت وعمري ماشفتك بتعمل حاجة مفيدة بالكمبلوتر ده ، بقى اسمع ، اني جاي لك النهاردة عشان نشوف طريقة نستفاد بيها من الكمبلوتر في البلد" .
أنا : انت تؤمر ياعم مغاوري .
مغاوري : اني امبارح كنت عند الواد صميدة بن ابو الغيط ، مانت عارف انه من يوم ماسقط في الثانوية راح فتح ورشة تصليح كمبلوتر ، وعرفني شوية حاجات كده قلت اجي استفاد من الكمبلوتر بتاعك بدال ماهو مالوش لزمة .
أنا : حاضر ياعم مغاوري .
مغاوري : أول حاجة ، فين لوحة الأم ؟
انا : آه تقصد الماذربورد ؟ جوة الجهاز .
مغاوري : بتعمل ايه جوة الجهاز ؟ انت ماتعرفش ياولا ان فيه ناس رسامين بيبيعوا لوح بالألافات وبعدين دي لوحة عن الأم وعيد الأم فاضل له كام يوم ، ماتيجي نوديها مصر يمكن تجيب لنا قرشين .
أنا : بس ياعم مغاوري .......
مغاوري : مافيش بس ، وبعدين قل لي فين المروحة بتاعة الكمبلوتر ياولا ؟
أنا : برضه جوة الجهاز .
مغاوري : وبتعمل ايه جوة الجهاز يامقصوف الرقبة ؟ الصيف داخل والدنيا حر ماتطلعها نتهوى بيها شوية .
أنا : بس المروحة دي صغيرة قوي ياعم مغاوري .
مغاوري : صغيرة صغيرة ، نحطها في اوضة صغيرة على قدها ، وبعدين قل لي ياولا ، مش الهارج جيسك بتاع الجهاز فيه ماطور ؟
أنا : أيوه ياعم مغاوري ، ماله ده راخر ؟
مغاوري : جاك ملة على جنابك ، انت مش عارف ان الماطور بتاع ماكنة الري بتاعتنا عطلان وباعتين نجيب واحد من البندر من شهرين ؟ ماتدينا الماطور بتاع المدعوق ده ، وانا كلي نظر لما نجيب الماطور من البندر هارجعهولك على طول .
أنا : الحكاية مش كده خالص ياعم مغاوري ، الموتور بتاع الهارد لو طلعته الهارد يبوظ ، وبعدين الموتور ده ........
مغاوري : ايوه ياخويا كل ماقولك حاجة تتهرب ، ماهو اني لازم استفاد مالكمبلوتر يعني لازم استفاد ، قل لي ياولا ، الواد صميدة (الله يخرب بيتك ياصميدة) قال لي ان الكمبلوتر فيه حاجة لمكافحة الديدان .
أنا : تقصد worm ، دي برامج مكافحة فيروسات .
مغاوري : ماتتفلسفش علي يالا وتتكلم بالانجليزي ، اني عاوز البرامج بتاعة الفيروز والدود دي عشان نجمع بيها الدودة من القطن ، وبدل مانجيب انفار يكلفونا دم قلبنا يبقى الكمبلوتر هو اللي ينقي الدودة .
أنا : ياعم مغاوري ماينفعش لأن ............
مغاوري : أمال فين العلبة الحديد بتاعة الكمبلوتر ؟
أنا : آه تقصد الكيسة ؟
مغاوري : ايوه ياخويا، البتاعة اللي عاملة زي الصندوق دي ، آني عاوزها للانفار اللي بيجمعوا البرتقال يجمعوه فيها بدل القفة اللي بتعوز نفرين يشيلوها ، أقله دي نفر واحد بس بيشيلها .
أنا : ياعم مغاوري .................
مغاوري : وبعدين ايه التلفزيون ده ؟
أنا : ده مش تليفزيون ده مونيتور ياعم مغاوري .
مغاوري : انت هتستسهبل على ياولا ؟ داني شايفك بعنيا بتتفرج فيه على الأفلام والمرسحيات والكارتون بتاع العيال ، أني هاخده .
أنا : ماهو ياعم مغاوري ، ده ماينفعش يشتغل من غير الكمبيوتر وبعدين ......
مغاوري : عنه ماشتغل ، آني هخده وافكه واعمله بنيه للحمام يبيض فيها ، الحمامة من دول بتطلع في الشهر جوز زغاليل بالشئ الفلاني أفيد من اللعب اللي انت طول النهار بتلعبه .
أنا : ياعم مغاوري أنا بتعلم برامج جديدة وبعدين انت مش فاهمني .......
مغاوري : بتتعلم برامج جديدة ، كنت اتعلم من زمان ياخويا ، وآخرتها تقول علي مابافهمش ياقليل الحيا ، اني الظاهر هادوقك العصا زي زمان ، وكمان لما ييجي ابوك هقوله اخليه يبيع المخروب ده ويشتري بتمنه حاجة مفيدة .
أنا أهرب خارج الغرفة : طب بس اديني فرصة اشرح لك ياعم مغاوري .....
وهكذا انتهت أو لم تنتهي قصتي مع عم مغاوري .ولذلك يااعزائي استسمحكم عذرا لو تغيبت عن المنتدى الفترة القادمة لو عم مغاوري نفذ تهديده وقال للوالد .
(( للكاتب خالد محروس ))
4 comments:
هههههههههههههههههههههههههه
جري اية يا أستاذ خالد دة انت غلبت العم مغاوري معاك خالص هههههههههههه
بس بجد تسلم ايدك موضوع جميل وكوميدي من الدرجة الاولي
مبروك المدونة الجديدة اللي أكيد هاتكون من المدونات المميزة بمجهوداتك وموضوعاتك الرائعة
بالتوفيق
أختك : هندا
حلوة جوي جوي يا أستاذ خااااااااااالد
يابووووووي دي تموت من الضووووحك
لا بجد تسلم ايدك موضوع جميل جدا
في انتظار المزيد من المواضيع الرائعة اللي زي دة
هههههههههههه
جميله جداااااااا
والله عم مغاورى ده حكايه ده بيعرف هندسه عشره على عشره
تحياتى ليك يا هندسه
رائعة يا باشمهندس
كده معانا بلال فضل جديد
ربنا يتقبل
Post a Comment